అధినేత ఆరోగ్యం గురించి ప్రపంచవ్యాప్తంగా పెద్ద చర్చ జరుగుతోంది. ఆయన ఆరోగ్యం విషమించిందంటూ అంతర్జాతీయ మీడియాలో పలు కథనాలు వెలువడుతున్న విషయం తెలిసిందే. అయితే దీనిపై ఇప్పటి వరకు ఆ దేశం కానీ.. అక్కడి అధికారిక మీడియా కానీ ఎలాంటి ప్రకటక చేయలేదు. పొరుగు దేశం చైనా ఏకంగా ఓ వైద్య బృందాన్ని శుక్రవారం పంపింది. ఈ నేపథ్యంలో వాన్సన్ నగరంలో కిమ్ ఉన్నట్టు భావిస్తున్నారు. దీనికి బలం చేకూరేలా కిమ్‌కు చెందిన ప్రత్యేక రైలు వాన్సన్ పట్టణంలో ఈ వారం పర్యటించినట్టు వాష్టింగ్టన్ కేంద్రంగా పనిచేసే 38 నార్త్ అనే వెబ్‌సైట్ తెలిపారు. ఉత్తర కొరియా వ్యవహారాలను పర్యవేక్షించే ఈ ప్రాజెక్టు ఉపగ్రహ చిత్రాల ఆధారంగా ఓ నివేదికను వెల్లడించింది.
వాన్సన్ స్టేషన్‌లో కిమ్‌కు చెందిన ప్రత్యేక రైలు ఏప్రిల్ 21 నుంచి 23 వరకు నిలిచి ఉన్నట్టు ఈ ప్రాజెక్ట్ శనివారం వెల్లడించిన నివేదిక పేర్కొంది. ఈ స్టేషన్‌ను కేవలం కిమ్ కుటుంబం మాత్రమే వినియోగిస్తుందని తెలిపింది. ఈ రైలు కిమ్ జోంగ్ ఉన్‌కు చెందిందేనని చెబుతున్నా.. రాయిటర్స్ మాత్రం దీనిని ధ్రువీకరించలేదు. ఈ స్టేషన్‌లో రైలు నిలిచి ఉన్నా కిమ్ ఆచూకీ గురించి మాత్రం ఖచ్చితమైన సమాచారం లేదు. కానీ, ఉత్తర కొరియా తూర్పు తీరంలోని ఓ ప్రాంతంలో కిమ్ ఉన్నట్లు జరుగుతున్న ప్రచారానికి బలానిస్తుంది.
ఉత్తర కొరియా వ్యవస్థాపకుడు, కిమ్ జోంగ్ ఉన్ తాత కిమ్ ఇల్ సంగ్ జయంతి ఉత్సవాలను ఏటా ఘనంగా నిర్వహిస్తారు. అయితే, ఈ ఏడాది జరిగిన ఉత్సవాలకు కిమ్ హాజరుకాలేదు. ఏప్రిల్ 15న జరిగిన కిమ్ ఇల్ సుంగ్ జయంతి వేడుకల్లో కిమ్ జాంగ్ ఉన్ కనిపించలేదు. ఆ దేశ మీడియా ప్రకారం ఏప్రిల్ 11న చివరిసారిగా కిమ్ ఓ సమావేశంలో పాల్గొన్నారు. దీంతో ఆయన ఆరోగ్య పరిస్థితిపై తీవ్ర చర్చ జరుగుతోంది. తాత జయంతి ఉత్సవాల్లో ఎప్పుడూ పాల్గొనే కిమ్ కనిపించకపోవడంతో ఆయన ఆరోగ్యంపై అనుమానాలు మరింత బలపడుతున్నాయి.
ఇదిలా ఉండగా.. కిమ్ ఆరోగ్యంపై దక్షిణ కొరియా స్పందించింది. కిమ్‌కు ఎలాంటి సమస్య లేకపోవచ్చిని ఆయన ఆరోగ్యంపై వస్తున్న వార్తలన్నీ వదంతులనేని కొట్టిపారేసింది. అదే సమయంలో అమెరికా అధ్యక్షుడు సైతం కిమ్ అనారోగ్యంపై అనుమానాలు వ్యక్తం చేశారు. కిమ్ బాగానే ఉన్నారని ఆశిస్తున్నానన్నారు ట్రంప్. అయితే ఇప్పుడు వస్తున్న వార్తల ప్రకారమైతే ఆయన పరిస్థితి చాలా తీవ్రంగా విషమించినట్టేనన్నారు. దీంతో కిమ్ హెల్త్ విషయంలో ఏదో జరుగుతుందన్న మాట మాత్రం స్పష్టమవుతోంది. ఉత్తర కొరియాలో ఏం జరుగుతుందో బయట ప్రపంచానికి తెలియడం దాదాపు అసాధ్యం.
