ఓ తల్లి ప్రేమ కరోనా వైరస్‌ను జయించింది. కోవిడ్ బారిన పడిన తన చిన్నారితో కలిసి 21 రోజులపాటు గడిపినప్పటికీ ఆ తల్లికి ఇన్ఫెక్షన్ సోకలేదు. కొద్దిపాటి జాగ్రత్తలు తీసుకున్న ఆమె తన బిడ్డను కరోనా నుంచి బయట పడేయడంతోపాటు.. ఆ మహమ్మారి బారిన పడకుండా తనను తాను కాపాడుకుంది. వివరాల్లోకి వెళ్తే.. ఛండీగఢ్‌లో నివసించే కైజర్ (25) అనే మహిళకు 17 నెలల పాప ఉంది. ఏప్రిల్ 18న ఆ చిన్నారికి కరోనా సోకింది. నానమ్మ ద్వారా ఆ చిన్నారికి కోవిడ్ సోకినట్లు డాక్టర్లు నిర్ధారించారు. పీజీఐఎంఆర్‌లో ఉంచి చికిత్స అందించడం ప్రారంభించారు.
కాగా తన బిడ్డను ఒంటరిగా హాస్పిటల్‌లో ఉంచడం ఇష్టం లేని కైజర్.. తను కూడా బిడ్డ పక్కనే ఉండాలని నిర్ణయించుకుంది. ఇందుకోసం ఫేస్ మాస్కు, ప్రొటెక్టివ్ సూట్ ధరించడంతోపాటు ఇతర జాగ్రత్తలు తీసుకుంది. పసి పాపను తాకకుండా ఉండటమనేది ఆ తల్లికి సాధ్యం కాలేదు. కానీ తనను తాకిన ప్రతిసారి చేతులను శుభ్రంగా కడుక్కునేది.
ఫేస్ మాస్క్‌ను పెట్టుకొని ఉండటం ఆ చిన్నారి వల్ల అయ్యే పని కాదు కాబట్టి.. తనే ఎప్పుడూ మాస్క్ పెట్టుకునేది. ప్రొటెక్టివ్ సూట్‌ను కూడా ప్రతి రోజూ మార్చేది. తరచుగా బెడ్ షీట్లను మారుస్తూ, ఉతికేస్తూ… తనను తాను శుభ్రంగా ఉంచుకుంటూ ఆమె కరోనా బారిన పడకుండా కాపాడుకోగలిగిందని డాక్టర్లు తెలిపారు.
బిడ్డతో కలిసి ఉందామని అనుకుంది గానీ.. మొదట కైజర్‌కు కూడా భయమేసిందట. ప్రొటెక్టివ్ సూట్, శానిటైజేషన్, వ్యక్తిగత పరిశుభ్రత గురించి డాక్టర్ల సూచనలను జాగ్రత్తగా విని పాటించింది. ‘‘డాక్టర్లు పాపను చూడటానికి వచ్చే ముందు తనను శానిటైజ్ చేసే దాన్ని, డాక్టర్లు వెళ్లాక మరోసారి శానిటైజ్ చేసే దాన్ని. స్విచ్ బోర్డులను కూడా వదలకుండా ప్రతి గదిని శుభ్రం చేసేదాన్ని’’ అని కైజర్ తెలిపింది. హాస్పిటల్ నుంచి ఇంటికెళ్లిన తర్వాత కూడా ఆ తల్లి ఇప్పుడు అదే శుభ్రతను కొనసాగిస్తోంది.
