కరోనాకు మందు కనిపెట్టా.. తమిళ వ్యక్తి స్టేట్‌మెంట్, అరెస్ట్ చేసిన పోలీసులు

ప్ర పంచాన్ని వణికిస్తున్న కరోనా వైరస్‌కు వ్యాక్సిన్ కనుక్కోవడానికి పలు దేశాలు పరిశోధనలు కొనసాగిస్తున్నాయి. వివిధ దేశాల్లో 100కు పైగా పరిశోధనలు జరుగుతున్నాయి. అయితే.. ఈ ప్రయత్నాలు ఫలించి వ్యాక్సిన్ అందుబాటులోకి రావడానికి కనీసం ఏడాదికి పైగా పట్టవచ్చని నిపుణులు అంచనా వేస్తున్నారు. ప్రపంచ ఆరోగ్య సంస్థకు చెందిన నిపుణులు కూడా ఇదే అభిప్రాయం వ్యక్తం చేశారు. అయితే.. తమిళనాడులో మాత్రం ఓ వ్యక్తి తాను కరోనా వైరస్‌కు మందు కనుగొన్నానని ప్రచారం చేసుకుంటున్నాడు. తాను కనుగొన్న ఆయుర్వేద ఔషధంతో కోవిడ్-19 ఇట్టే తగ్గిపోతుందని చెప్తున్నాడు. పోలీసులు అతడిని అరెస్టు చేసి కటకటాల వెనక్కి నెట్టారు.

తమిళనాడులోని కొయామ్‌బేడుకు చెందిన తనికశాలమ్‌ అనే వ్యక్తి తనకు తాను ఆయుర్వేదిక్ నిపుణుడిగా ప్రచారం చేసుకుంటున్నాడు. తాను కరోనాకి ఆయుర్వేదిక్‌ మందు కనిపెట్టానని సోషల్‌ మీడియాలో తెగ ప్రచారం చేస్తున్నాడు. ఆ మందుతో 48 గంటల్లో కరోనా వ్యాధి సోకిన వ్యక్తిని మాములు మనిషిని చేస్తానంటూ సవాల్‌ విసిరాడు. లండన్‌లో కరోనా బారినపడ్డ ఓ వ్యక్తిని కాపాడటానికి అక్కడి వైద్యులు విఫలమైన వేళ తాను పంపించిన మందులతో నయమైందని చెప్పుకొచ్చాడు.

Watch:

సదరు ఆయుర్వేదిక్ వైద్యుడి విషయం ఇండియన్‌ మెడిసిన్‌ అండ్‌ హోమియోపతి అధికారుల దృష్టికి వచ్చింది. దీంతో పోలీసులకు ఫిర్యాదు చేశారు. విచారణ చేపట్టిన పోలీసులు అతడు ప్రచారం చేసుకుంటున్నవేవీ నిజం కాదని తేల్చారు. అతడిపై కేసు నమోదు చేసి అదుపులోకి తీసుకున్నారు. కొయామ్‌బేడు బస్‌స్టాప్‌ సమీపంలో తనికశాలం ఎలాంటి అనుమతులు, అర్హతలు లేకుండా ఓ ఆయుర్వేద ఆసుపత్రిని నడుపుతున్నట్లు పోలీసుల విచారణలో తేలింది. కరోనాకు సంబంధించి సోషల్ మీడియాలో అతడు 70కి పైగా వీడియోలను పోస్ట్‌ చేసినట్లు గుర్తించారు.

అగతియార్‌, పోగర్‌ లాంటి సిద్ధులు సైతం పెద్దగా చదువు లేకుండానే అనేక వైద్య విధానాలను కనుగొన్నారని.. ఔషధం కనిపెట్టడానికి చదువుకు సంబంధం లేదని తనికశాలం చెప్తుండటం గమనార్హం. తప్పుడు ప్రచారం చేస్తున్న అతడిపై డిజాస్టర్‌ మేనెజ్‌మెంట్‌ యాక్ట్‌ సెక్షన్‌ 54 కింద కేసు నమోదు చేసి అరెస్ట్‌ చేశారు. తప్పుడు పద్దతుల ద్వారా ప్రజలను ప్రభావితం చేయడం, సోషల్‌ మీడియా ద్వారా తప్పుడు వార్తలు వ్యాప్తి చేయడం లాంటివి ఎపిడమిక్‌ డిసీస్‌ యాక్ట్‌ అండ్‌ రెగ్యులేషన్‌ చట్టం ప్రకారం నేరమని పోలీసులు తెలిపారు.

Also Read:

LEAVE A REPLY

Please enter your comment!
Please enter your name here