మరో కీలక నిర్ణయం దిశగా ట్రంప్.. అదే జరిగితే భారత ఐటీ నిపుణులకు గడ్డుకాలం!

కరోనా వైరస్ ప్రజల ప్రాణాలపైనే కాదు, వారి జీవనోపాధిపై కూడా గణనీయమైన ప్రభావం చూపుతోంది. మహమ్మారి వల్ల అమెరికాలో ఉద్యోగాలు పోయి వీధినపడుతున్న వారి సంఖ్య క్రమంగా పెరుగుతోంది. ఒక్క ఏప్రిల్‌లోనే 2 కోట్ల మందికిపైగా ఉద్యోగాలు కోల్పోయారు. ఫలితంగా మార్చిలో 4.4 శాతంగా ఉన్న నిరుద్యోగిత రేటు ఏప్రిల్‌లో ఏకంగా 14.7 శాతానికి పెరిగింది. మరోవైపు, 50 లక్షల మంది ఉద్యోగుల పనిగంటలను ఆయా సంస్థలు గణనీయంగా తగ్గించేయడంతో అది వీరి ఆదాయంపై ప్రభావం చూపనుంది. అలాగే, దేశంలో నిరుద్యోగ భృతి కోసం 3.3 కోట్ల మంది ఎదురుచూస్తున్నారు.

ఈ నేపథ్యంలో అధిక నైపుణ్యం కలిగిన భారతీయ ఐటి నిపుణులకు జారీచేసే హెచ్-1బీ లాంటి వర్క్ బేస్డ్ వీసాలపై తాత్కాలికంగా నిషేధం విధించడానికి ట్రంప్ సిద్ధమవుతున్నారు. అలాగే విద్యార్థుల వీసాలను తాత్కాలికంగా నిషేధించనున్నట్టు వాల్‌స్ట్రీట్ జర్నల్ శుక్రవారం ఓ నివేదిక వెలువరించింది. హెచ్-1బీ నాన్-ఇమ్మిగ్రేషన్ వీసా.. అమెరికాలోని సంస్థల్లో భారత్, చైనా లాంటి దేశాలకు చెందిన విదేశీ నిపుణులు పనిచేయడానికి అవకాశం కల్పిస్తుంది. ప్రస్తుతం ఇలాంటి వారు అమెరికాలో 5 లక్షల మంది ఉన్నారు.

తాత్కాలిక, పని ఆధారిత వీసాలపై తాత్కాలిక నిషేధం విషయంలో అధ్యక్షుడు డొనాల్డ్ ట్రంప్ ఇమ్మిగ్రేషన్ సలహాదారులు ఎగ్జిక్యూటివ్ ఆర్డర్ కోసం ప్రణాళికలు రూపొందిస్తున్నారని, ఇది ఈ నెలలో అమల్లోకి రానుందని వాల్‌ స్ట్రీట్ జర్నల్ తెలిపింది. అధిక నైపుణ్యం కలిగిన విదేశీయులకు జారీచేసే H-1B,కాలానుగుణ వలస కార్మికులకు జారీచేసే H-2B, స్టూడెంట్స్ వీసా సహా వారికి పనిచేసే వెసులుబాటు కల్పించే వీసాలపై దృష్టి సారించినట్టు పేర్కొంది. ఇప్పటికే రెండు నెలల పాటు ఇమ్మిగ్రేషన్‌పై తాత్కాలిక నిషేధం విధించిన విషయం తెలిసిందే.

కరోనా వైరస్ మహమ్మారి కారణంగా ఆర్ధిక వ్యవస్థ క్షీణించడంతో గత రెండు నెలల్లో దాదాపు 33 మిలియన్ల మంది అమెరికా పౌరులు ఉద్యోగాలను కోల్పోయారు. జనవరి 1948 తర్వాత ఇంత పెద్ద సంఖ్యలో నిరుద్యోగిత పెరగడం ఇదే తొలిసారి. అమెరికా ఆర్ధిక వృద్ధిరేటు తిరోగమనంలో ఉందని ఐఎంఎఫ్, ప్రపంచ బ్యాంకులు అంచనా వేశాయి. రెండో త్రైమాసికంలో వృద్ధిరేటు 15 నుంచి 20 శాతం తిరోగమనంలో ఉంటుందని వైట్‌హౌస్ అధికారులు అంచనా వేస్తున్నారు.

LEAVE A REPLY

Please enter your comment!
Please enter your name here