కరోనా వైరస్ విషయంలో అమెరికా అధ్యక్షుడి వైఖరిపై సర్వత్రా విమర్శలు వెల్లువెత్తుతున్న విషయం తెలిసిందే. వైరస్‌ను సమర్థంగా ఎదుర్కోవడంలో ట్రంప్ విఫలమయ్యారని దుయ్యబడుతున్నారు. తాజాగా, ఈ జాబితాలో మాజీ అధ్యక్షుడు బరాక్‌ ఒబామా సైతం చేరారు. మహమ్మారిని నియంత్రించడంలో ట్రంప్ తీరును ఎండగడుతూ.. తన హయాంలో పనిచేసిన సిబ్బందితో మాట్లాడిన ఆడియో ఒకటి శుక్రవారం వెలుగులోకి వచ్చింది.
అలాగే, ట్రంప్ తొలి జాతీయ భద్రతా సలహాదారు మైఖేల్‌ ఫ్లిన్‌పై వచ్చిన ఆరోపణల్ని న్యాయశాఖ ఎత్తివేయడంపైనా ఒబామా తీవ్ర అసంతృప్తి వెళ్లగక్కారు. మరికొన్ని నెలల్లో అధ్యక్ష ఎన్నికలు జరగనున్న నేపథ్యంలో ఒబామా వ్యాఖ్యలకు ప్రాధాన్యత ఏర్పడింది.
కొవిడ్‌-19ను ట్రంప్ ఎదుర్కొన్న తీరును ‘కచ్చితమైన గందరగోళ విపత్తు’గా ఒబామా అభివర్ణించారు. తన అల్యుమినీ అసోసియేషన్‌లోని మూడు వేల మంది సభ్యులతో మాట్లాడిన ఒబామా.. డెమొక్రాట్ అభ్యర్థి జో బిడెన్‌కు మద్దతివ్వాలని పిలుపునిచ్చారు.
గత శతాబ్దంలో ఎన్నడూ లేనివిధంగా అత్యంత ఘోరమైన సంక్షోభం ఎదుర్కొంటుంటే, మార్గనిర్దేశం చేయడంలో విఫలమయ్యారని, నాయకత్వ పాత్ర నుంచి తప్పుకున్నారని విమర్శించారు. మహమ్మారి కట్టిడికి అవసరమైన వైద్య పరికరాలు లభించక రాష్ట్రాలు ఇబ్బందులు ఎదుర్కొంటున్నాయని విమర్శించారు.
‘స్వార్థం, ఆటవికత, విభజన, ఇతరులను శత్రువులగా చూడటం వంటి పోకడలు ప్రస్తుతం అమెరికన్ల జీవితాల్లో భాగమయ్యాయి. అంతర్జాతీయంగానూ ఇదే తీరు కొనసాగుతోంది. ఈ పరిణామాల వల్లే తాజా సంక్షోభాన్ని ఎదుర్కోవడంలో ప్రపంచ దేశాలు చాలా పేలవంగా స్పందిస్తున్నాయి’ అని ఒబామా అభిప్రాయపడ్డారు.
ఇలాంటి సంక్షోభాన్ని ఎదుర్కొవడం మెరగైన ప్రభుత్వాలకు సైతం సవాల్‌తో కూడుకున్న అంశమని.. ఈ తరుణంలో ‘నాకేంటి అన్న ధోరణితో సాగుతూ.. అందరితో కయ్యానికి కాలుదువ్వే పాలకవర్గం ఉండటం విపత్తును మరింత గందరగోళంగా మార్చిందని ఒబామా తూర్పారబట్టారు. సంస్థాగత నిబంధనలకే కాదు, ప్రాథమికంగా ఆందోళన కలిగించే అంశం ఇది, చట్ట నియమాల గురించి మా ప్రాథమిక అవగాహన ప్రమాదంలో ఉందని ట్రంప్ మాజీ సలహాదారు విషయంలో తీసుకున్న చర్యలపై పెదవి విరిచారు.
గతంలో పలుమార్లు ఒబామా పాలనపై ట్రంప్ విమర్శలు గుప్పించినా, ఆయన మాత్రం ఏనాడూ పెద్దగా స్పందించిన దాఖలాలు లేవు. తాజా రాజకీయాలపై వ్యాఖ్యానించిన సందర్భాలూ కూడా స్వల్పమే. తత్విరుద్ధంగా ట్రంప్‌పై విమర్శలు గుప్పించడం.. బిడెన్‌కు మద్దతుపలకడం వంటి పరిణామాలను బట్టి వచ్చే అధ్యక్ష ఎన్నికల్లో ఒబామా కీలకంగా వ్యవహరించే అవకాశం ఉన్నట్లు కనబడుతోందని విశ్లేషకులు అభిప్రాయపడుతున్నారు.
జో బిడెన్‌ను గెలిపించడం కోసం తాను కావాల్సినంత సమయాన్ని వెచ్చిస్తానని ఒబామా తన మద్దతుదారులకు హామీ ఇవ్వడం కొసమెరుపు. ట్రంప్‌ను సమర్థంగా ఎదుర్కొనేందుకు ఒబామాను కావాలనే డెమొక్రాట్లు రంగంలోకి దింపారనే వాదన వినిపిస్తోంది. ఆర్థిక సంక్షోభం నుంచి ఎలా బయటపడాలో స్పష్టమైన విధానం లేకుండా ఆంక్షలు ఎత్తివేసినట్టు ప్రకటించిన ట్రంప్.. తిరిగి అధ్యక్ష ఎన్నికల్లో విజయం సాధించాలనే తన రాజకీయ ప్రయోజనాల కోసం ప్రజల జీవితాలను ప్రమాదంలోకి నెట్టేశారనే వాదన వినబడుతోంది.
