కేవలం గ్లామర్ ప్రాధాన్యత ఉన్న పాత్రల్లోనే కాకుండా నటనకు ఆస్కారం ఉన్న రోల్స్ చేస్తూ తనకంటూ ఓ ప్రత్యేకతను సంపాదించుకుంది నటి సమంత. ఇదివరకు సామ్ నటించిన కొన్ని చిత్రాలు దీనికి ఉదాహరణ. పలు చిత్రాల్లో డి గ్లామర్ రోల్ లో నటించి కూడా ప్రేక్షకులను ఆకట్టుకుందీ చిన్నది. ఇదిలా ఉంటే సమంత మరోసారి ఓ చాలెంజింగ్ పాత్రలో నటించనున్నట్లు తెలుస్తోంది.
సమంత ప్రధాన పాత్రలో ‘గేమ్ ఓవర్‘ ఫేమ్ అశ్విన్ శరవణన్ దర్శకత్వంలో ఓ సినిమా తెరకెక్కనుందని ఇప్పటికే వార్తలు వచ్చాయి. తెలుగు, తమిళ, హిందీ భాషల్లో ఈ సినిమాను తీయడానికి దర్శక నిర్మాతలు ప్లాన్ చేస్తున్నారు. అయితే ఈ సినిమాలో సమంత తొలిసారి దివ్యాంగురాలి(మాటలు రాని, చెవులు వినపడని) పాత్రలో నటించనుందని సమాచారం. మరి ఇలాంటి చాలెంజింగ్ పాత్రలో సమంత ప్రేక్షకులను ఎలా ఆకట్టుకుంటుందో చూడాలి. ఈ చిత్రానికి సంబంధించిన పూర్తి వివరాలు తెలియాల్సి ఉంది.