కర్నాటకలోని కొడవ సామాజిక వర్గానికి చెందిన శరత్ పన్నొప్ప అనే వ్యక్తి కాలిఫోర్నియాలో డాక్టర్గా పనిచేస్తున్న సందీప్ని పెళ్లి చేసుకోవడం ఇప్పుడు వివాదాస్పదమైంది. అయితే వీరిది మామూలు వివాహం కాదు. వీరు గే లు. ఈ గే జంట పెళ్లిపై కర్నాటక కొడగు జిల్లా ప్రజలు మండిపడుతున్నారు. తమ సామాజిక వర్గానికి చెందిన ఈ వ్యక్తి ఇలా చేయడం తాము అంగీకరించడం లేదంటున్నారు.
ఈ గే పెళ్లి అయిన తర్వాత ఈ ఫోటోలు సోషల్ మీడియాలో హల్చల్ చేశాయి. దీంతో కొడుగు జిల్లా ప్రజలు దీన్ని ఖండించారు. తమ ఆచారాలను శరత్ నాశనం చేశారని మండిపడ్డారు. దీంతో ఈ వ్యక్తిని తమ సామాజిక వర్గం నుంచి వెలివేస్తున్నట్లు ప్రకటించారు. శరత్ తల్లిదండ్రులు దుబాయ్లో ఉంటున్నారు. విషయం తెలిసిన వీరు దీనిపై ఇంతవరకు స్పందించలేదు. ప్రపంచ వ్యాప్తంగా 3 లక్షల మంది కొడవ సామాజిక వర్గానికి చెందిన జనాభా ఉన్నారు.
విషయం తెలుసుకున్న వెంటనే మడికెరి కొడవ సమాజ ప్రెసిడెంట్ కేఎస్ దేవయ్య మాట్లాడుతూ ఈ వివాహాన్ని ఖండిస్తున్నామన్నారు. తమ కులానికి శరత్ మచ్చ తెచ్చాడని ఆవేదన ఆయన వ్యక్తం చేశారు. అయితే దీనిపై ఇంతవరకు శరత్ స్పందించలేదు. ఈ సామాజిక వర్గానికి చెందిన వారు ప్రధానంగా అడవులు, పర్వతాలు, నదులు, నీటి కాలువల వద్ద నివాసం ఉంటారు. వీరు కాఫితోటలను పండిస్తారు. వీరి సాంప్రదాయాలను ఎవ్వరు అవమానించినా వీరు తీవ్ర స్థాయిలో ప్రతిఘటిస్తారు. మొత్తానికి ఈ గే పెళ్లి వీరి సమాజిక వర్గంలో తీవ్ర అలజడి సృష్టించింది. మరి శరత్ ఎలా స్పందిస్తాడో వేచి చూడాలి.