బాలీవుడ్ హీరో సుశాంత్ సింగ్ రాజ్‌పుత్ సూసైడ్ చేసుకోవడం అందర్నీ కలచివేసింది. అతనికి సంతాపం తెలుపుతూ సినీ, క్రీడా ప్రముఖులు ట్వీట్ చేయగా.. టీమిండియా మాజీ కెప్టెన్ మహేంద్రసింగ్ ధోనీ మాత్రం ఇప్పటి వరకూ స్పందించలేదు. వాస్తవానికి ధోనీ బయోపిక్ ద్వారానే స్టార్ హోదాని సుశాంత్ దక్కించుకున్నాడు.
2016లో వచ్చిన ధోనీ బయోపిక్ ‘ఎం.ఎస్.ధోని: ది అన్‌టోల్డ్ స్టోరీ’ సినిమాలో ప్రధాన పాత్ర పోషించిన సుశాంత్ సింగ్ రాజ్‌పుత్.. అచ్చం ధోనీలానే మేనరిజాన్ని దింపేశాడు. మైదానంలో హెలికాప్టర్ షాట్లతో ధోనీని తలపించిన సుశాంత్.. గ్రౌండ్ వెలుపల ధోనీ జెర్సీని పైకి ఎగరేసే స్టయిల్‌ని కూడా చక్కగా అనుకరించాడు.
‘ఎం.ఎస్.ధోని: ది అన్‌టోల్డ్ స్టోరీ’ సినిమా కోసం ధోనీతో కలిసి చాలా రోజులు సుశాంత్ సింగ్ రాజ్‌పుత్ ట్రావెల్ చేశాడు. ఆ క్రమంలో ధోనీ మేనరిజాన్ని ఒడిసిపట్టుకున్న సుశాంత్.. అతని ఫ్యామిలీకి కూడా చాలా క్లోజ్ అయ్యాడు. సినిమా చూసిన తర్వాత సుశాంత్ అంకితభావానికి ధోనీ ఫిదా అయినట్లు నిర్మాత అరుణ్ పాండే తాజాగా వెల్లడించాడు.
ధోనీ, సుశాంత్ మధ్య క్లోజ్ రిలేషన్‌షిప్ ఉండటంతో.. సూసైడ్‌పై ధోనీ ఎలా స్పందించాడు..? అని అంతా ఆసక్తిగా ఎదురుచూశారు. కానీ.. ధోనీ నుంచి ఎలాంటి స్పందన లేదు. భారత కెప్టెన్ విరాట్ కోహ్లీ, ఓపెనర్ రోహిత్ శర్మతో పాటు చాలా మంది క్రీడా ప్రముఖులు సుశాంత్ మృతిపై సంతాపం తెలిపారు. కానీ.. ధోనీ ఎందుకు స్పందించలేదు అని నెటిజన్లు కారణం వెతికే పనిలో పడ్డారు.
ధోనీ స్పందనపై చర్చ జరగడంతో అతని మేనేజర్, ‘ఎం.ఎస్.ధోని: ది అన్‌టోల్డ్ స్టోరీ’ నిర్మాత అరుణ్ పాండే స్పందించాడు. ‘‘సుశాంత్ సూసైడ్‌ని మేము ఇంకా నమ్మలేకపోతున్నాం. నా బాధ వర్ణణాతీతం. ఆ ఆత్మహత్య గురించి వినగానే ధోనీకి ఫస్ట్ చాలా కోపం వచ్చింది’’ అని అరుణ్ పాండే వెల్లడించాడు.
వాస్తవానికి సోషల్ మీడియాకి ధోనీ కాస్త దూరం ఉంటాడు. 2019 వన్డే ప్రపంచకప్ తర్వాత ఆ దూరం మరింత పెరిగింది. ఇటీవల రిటైర్మెంట్‌పై రూమర్స్ పెరగడం కూడా దానికి ఓ కారణం కావొచ్చు. అయితే.. ధోనీ గురించి సమాచారం, రూమర్స్‌ని ఖండించే బాధ్యతని అతని భార్య సాక్షి గత కొంతకాలంగా చూస్తోంది. అందుకే.. సుశాంత్ సూసైడ్‌పై ధోనీ నుంచి ఎలాంటి ట్వీట్ రాలేదని తెలుస్తోంది. అతని భార్య సాక్షి కూడా సుశాంత్ గురించి ఎలాంటి ట్వీట్ చేయకపోవడం గమనార్హం. మొత్తంగా సుశాంత్ సూసైడ్ చేసుకోవడం ధోనీకి నచ్చలేదని అందుకే స్పందించలేదనే వాదనలు కూడా వినిపిస్తున్నాయి.
